Послание Фотея митрополита о агнецех святых

Послание Фотея митрополита о агнецех святых
      Благословение Фотея, митрополита Киевского и всея Руси, в Псков собору Святыя Троици и всему священническому чину. Что ми, сынове, пишите к нашому смирению от недоведомых Божественных таин и о прочих вещех, и о сем благодарю ваше священство. Идеже понеже убо еже вразумевасте великое Божье священство, идеже бо священник священно съвершаеть, и тамо ангели желают приникнути. И что ми пишете, сынове, прьвое въспрос имеа о Божественных и о святых Агнецех: по обычному благословению от настаателя приходить ерей купно со диаконом пред святаго жертвеника, и дискос убо поставляет от левыа страны, Святую же Чашю от десныа страны, яко же по чину их, по обычаю и прочаа. И творять по три поклоны пред святою проскомидиею, глаголюще в собе: «И искупил ны есть нас от клятвы законныа честною Си Кровию. Таже поп рече: «Благословен Бог нашь, всегда и ныне и присно», и приемлет в десную руку святое копье, в левую же руку проскуру, и знаменаеть копьем трижды, глаголя над проскурою с копьем: «Вспоминание Господа и Бога и Спаса нашего Иисуса Христа». И абье вънзет копье от левыя страны проскуры и прорезает от себе кверху по левой стране глаголя: «Яко овчя, на заколение веден»; на десной же стране глаголеть: «Яко агнец, прямо стригущему его безгласен, тако не отверзает уст Своих»; на горней же стране глаголеть: «В смирении Его суд Его взятся»; на дольней же стране глаголеть: «В смирении Его суд Его взятся»; на исподней стране глаголеть: «Род же Его кто исповесть»; выимая же глаголеть: «Яко вземлеться от земля живот Его». И полагаеть его во знак во святом дискосе, и прорезает его священник крестообразно, глаголя: «Жрется Агнець Божьи, вземляй грехы всего мира, за мирскый живот и спасение». И превращаеть его ниць, аще несть тепл, яко же преже рехом, и не прободает же его, но приемлет другую просфиру и не глаголеть: «Благословен Бог наш». «Во въспоминание Господа и Бога и Спаса нашего Иисуса Христа»,— трижды глаголеть сие над Агнецом и с копьем крестообразно, яко же преже указахам; таж режа глаголеть: «Яко овчя, на заколение ведеся», и прочая такоже по обычаю, а не прободаеть его и сего, но токмо пререзуеть и сего глаголя: «Жрется и закалается». И тако приемлеть и третьюю просфиру и творит на ней, яко же и на первой; «благословен же Бог наш» — не глаголеть, но токмо обычная, елико будуть надобно Агнецов, и творить сие и на прочих. Последи сложив Агнеци на три части по два, аще суть шесть, и прикладываеть святое копие одно ко всем Агнецам, от десныя страны глаголя: «Един от воин копьем прободена». Таж дьякон, приемь благословение от иереа, вливает вино и воду во Святую Чашю, и посемь бываеть проскомисание и конець его, яко же писано по обычаю, и литургиа по обычаю Златоустаго или великого Василья. Егда свершится служба вся до: «Вонмем, святая святым», и тогда един Агнець разламляеть на четыре части и едину влагает во Святую Чашю, и три части на святом дискосе, от нихже долняя часть святого Агнеця, той причащаемся. И преже убо святого причащения напаяет святые Агнеци Святою Кровью от Святыа Чаши на всех четырех углех святого Агньца коегождо и влогает их в уготованное им место, а и тии доры, от нихже выиманы святы Агнеци, опроче блюдомы суть или в том же сосуде, но пределя промежи святых Агнецев имущи. А еже инии творят сице, напаяя святыя Агнеци, и пологають в тыя же доры, от нихже выиманы суть святыа Агнеци, и се убо неподобно есть отъинудь, и нечестивых бо се есть; но особ пребывати должни суть.


О ПЕНЬИ СВЯЩЕННИКОМ И МИРЯНИНОМ



      Еже ми писасте, како попу пети во своем дому пред святыми иконами: аще восхощеть все по церковному правилу пети, то не возбраняется ему; аще ли одино начало творити рекши: «Благословен Бог нашь» — и отпуск токмо, и се на его произволении есть, но небещенней сия вся во славу Богу творить со вниманием. А мирскым людям, православно живущим, подобно и сим правило церковное держати пред святыми иконами во своих домех, понеже и должни суть творити сиа. Аще произволят, на вечернице великую вечере или малую и паки, воставши от ложа, полунощниц и заутреняа, со Псалтырою и со прочим последованием, должни суть творити, аще произволять; а священническаго ничтоже не творить, ни начало: «Благословен Бог нашь», вместо начала глаголеть сице: «Молитвами святых отець наших, Господи Иисусе Христе Сыне Божии, помилуй нас, аминь»; а вместо отпуста глаголеть сице: «Молитвами Пречистыа Ти Матери и всех святых, Господе Иисусе Христе Сыне Божии, помилуй нас, аминь».


А СИЕ О АЛЛИЛУИИ



      Что ми пишете о «аллилуии» и на «славах» сице глаголи: «Слава Отцю и Сыну и Святому Духу, и ныне и присно, в веки веком, аминь. Аллилуиа, аллилуиа, аллилуиа, слава Тобе, Боже. Аллилуиа, аллилуиа, аллилуиа, слава Тобе, Боже. Аллилуиа, аллилуиа, аллилуиа, слава Тобе, Боже. Слава Отцю, и ныне и присно». А «Бог Господь» поють на утрении пятью, яко же предано святыми отци, понеже три стиха суть. Преже убо поеть певець среди церкви, зря ко востоку, еклисиарх или на то устроеный мних, и поеть: «Бог Господь явися нам»; и 1-й лик в той же глас: «Бог Господь явися нам, благословен грядый»; и певець стих 1-й: «Исповедайтеся Господеви»; и другой лик 2-е: «Бог Господь явися нам»; и певець 2-й стих: «Не умру, но жив буду, исповем дела Господня»; и лик 1-й в третье: «Бог Господь явися нам»; и певець третий стих: «И есть дивна во очию нашею»; и 2-й лик 4-е: «Бог Господь явися»; и 1-й лик опять: «Бог Господь»; и по сему чину и «аллилуиа» в посты на глас Охтоику пятью со стихи их, а на молебене, яко же произволять по обычаю их.


ПРАВИЛО О СВЯЩЕННИКАХ И МИРЯНАХ



      А попу, держа другого попа в покаянии у себе, самому у него неподобно каятися; аще ли у своего отца духовного восхощеть Тело и Кровь Господню приимати, причаститися, то невъзбранно. Котории люди бес покаяниа живуть, а отца духовного не дръжать, аще и ко церкви приходять или не приходять,— не приимать от них приношениа к церкви; а своим детем духовным възбраняйте с таковыми ясти и пити, ни во своа домы призывати, ниже к ним ходити, понеже и сами сии отлучишася стада Христова словесных овец. И, елика сила, таковых приводити к покаянию и от злых приимати с радостью, а не гордяся, да не погибнеть во своем нечестьи.


О ПОНАГИИ



      А что ми пишете о вечерни и понагии: аще созвани бывше со благочестьем в дом некоего христолюбца, на тряпезе по вечерянии молвити Богородици, яко же устав держит. На тряпезе преже обеда святый хлебець Богородици святыя выняти и по вечерянии, певше обычная, святыя Богородици хлебець въздвизати по обычаю, яко же указася во устав; и священники сами от него ядять, и прочим дають, аще ли плотью чисты.


О КРЕСТАХ



      Да еже на кресте имени не будеть, тому не поклонитися, а не поругатися ему, ниже разоряти таковых. А крест имуть новый делати, велик или мал, яко же художник и мастерь на се устроенный, чим таковое устроити действо, или снастью некоею, или гвоздья, ко довлению на утвержение есть: сие не поругание есть кресту, но утвержениа ради повелено есть мужем окажен. А мирскым людям во своих домех, православно живущим по закону Господню, а не присовокупився к жене своей, достоит кадить святыа иконы и самым, аще ли не будеть священника ту; и не токмо самем мужем, но и женам благочестивым и чистым от мужа кадити повелеваю, и детей своих тому же учите, аще и велми малы суть, понеже православных сия обычая суть.


О ЦЕРКВАХ



      А церкви ветшаныа и кровли их, аще не суть довални ни на чтоже, ни на кою потребу к тойже церкви, а не ко иному устроению потребни, таковое повелеваю огнем сожещи и попел их всыпати в текущюю воду, да не сквернится святое небрежения ради или скота. А кресты, иконы ветшаныа оставити тако пребывати, но в честне месте и в устроени. А не своих детей не венчай; ни проводы пети, аще некая великая нужа случиться.


О СВЯТЫХ ВЕЛИКЫХ ТРЕХ СВЯТИТЕЛЬ: ВАСИЛИА, ГРИГОРИА, ИОАННА ЗЛАТОУСТАГО



      А что мя вопрошаете о трех святых великых трех святитель и равных апостолом, Великаго глаголю Василия и Иоана Златоустаго, Григория Богослова: о сих убо известно и разумне навыкох, таковое правило положено бысть сими Божествеными писаньми и святыми отци и законноположися празновати месяца генваря в 30 день, еже и вся вселенная сдержит, идеже есть православное христьянство, сим единокупно празник сотворяюще торжествен стихарями, и чтении, и всенощными славословьи. Понеже бо, яко большии суть святителем, яко вселенней сущая светила нелестная, небоявленныа звезды и апостолом единоравнии, яко Иоан блаженый, святитель Евхатский, движим Святым Духом, пиша о них и украшая похвалами праздньство их, и во едином от своих писании рече сице, яко аще и дерзостно есть глаголемое се: «Аще, — рече, — не быша велиции сии три святителя были, достоаше быти второму апостольскому пришествию на землю». И смотри мужа художству во едином месяци обретаеть и сих всех триех в том, и пологает сим праздник в 30-е месяца. Темже и аз, ревнуя сих преданию истинному, и вам повелеваю и молю вашю любов: не обленитеся сии праздник всяческы совершати и украшати, торжествеными похвалами же и всенощными славословьи, и помощи от них требовати, понеже суть ходатаи ко Богу. Святого же Иполита в 30-е месяца сего служба есть, поется на павечерници преже сего дни или когда разсудить еклисиарх по предатае к Богу.


      По премногу же бых писал о всем к вашой любви, понеже устав много сдержить: ныне сие случися тако, вмале сие написах вам. А дана грамота на Москве месяца августа в 12 день, индикта 12, в лето 6927 (т.е. 1419)»

Ресурс: Виртуальная школа БАКАЙ
Статья: Послание Фотея митрополита о агнецех святых
Опубликовано:
Автор:
Читателей:514

Оценка статьи:
ОтвратительноУжасноПлохоСреднеХорошоПохвальноОтличноПревосходноПрекрасноВеликолепно!
[Голосов: 3]



 
Словарь компьютерных терминов Гашение (Suppression)
Гашение
Гашение изображение (blankinf, display suppression)
1.Подавление визуализации одного или более примитивов вывода или сегментов .
2.Стирание содержимого экрана дисплея , выполняемое аппаратным
Линия времени 1400-1027 до н.э. Государство и династия Инь (Шан).
1400-1027 до
Основателем династии Шан считается Чэн Тан, покоривший племя ся. Для обозначения этой династии и государства применяется иероглиф «инь», поэтому употребляется два названия царства – Шан и Инь.
Химическая энциклопедия XVI в.
XVI в.
Алхимик Василий Валентин (псевдоним группы более поздних авторов) в трактате "Триумфальная колесница антимония" описал соляную кислоту [хлороводородная HCl - водный раствор хлороводорода HCl с
Химическая энциклопедия 1675
1675
Н. Лемери дал определение химии как искусства "разделять" различные вещества, содержащиеся в смешанных тела" (минеральных, растительных и животных).
БиоМозаика Аляскинский маломут
Аляскинский
Аляскинский маламут - древняя и воистину прекрасная порода. Кареглазые красавцы впечатлят любого: мощные, гордые, красивые, грозные, с острыми клыками. Но несмотря на такой вид очень
Биологический справочник Закономерности онтогенеза
Закономерности
В XIX веке немецкие натуралисты Эрнст Геккель (1834-1919) и Фриц Мюллер (1821-1897) сформулировали биогенетический закон: онтогенез (индивидуальное развитие особи) в краткой и ускоренной форме